Рөстәм Миңнеханов: “Түбән Кама – Татарстанның перспективалы мәйданы”

Татарстан Президенты Рөстәм Миңнеханов Түбән Кама муниципаль районына эшлекле сәфәр кылды.

Республика башлыгы “Патриот” хәрби-патриотик үзәген ачуда катнашты. Аннары ТР Президенты катнашында Түбән Кама районы Советы һәм Түбән Кама шәһәре Советы сессияләре утырышы узды.

Сессиядә Түбән Кама муниципаль районы башлыгы һәм Түбән Кама мэры Айдар Метшин төп доклад белән чыгыш ясады. Аның сүзләренә караганда, 2010 елда районда сәнәгать производствосы индексы 112,5 процент тәшкил иткән. 274,5 миллиард сумлык тауар чыгарылган һәм хезмәт күрсәтелгән. 131 мең кв. метр торак торгызылган. 464 ветеран өй туйлары үткәргән. Узган ел нәтиҗәләре буенча Түбән Кама районы ТР районнары арасында беренче урынга чыкты.

"Түбән Кама – Татарстанның җитди һәм перспективалы мәйданы”, - дип билгеләп үтте үз чыгышында Рөстәм Миңнеханов. Аның сүзләренә караганда, бүген “Патриот” хәрби-патриотик үзәге ачылу, Ватанны саклаучылар көне алдыннан, шәһәргә һәм районга яхшы бүләк булды. Республика башлыгы барлык ир-атларны да якынлашып килүче бәйрәм белән котлады.

ТР Президенты фикеренчә, төрле торак төзелешен үстерү перспективалы бурычларның берсе булырга тиеш. Хәзер республикада социаль ипотека программасы гамәлгә ашырыла, әмма шәхси торак һәм коммерция ипотекасын да онытмаска кирәк. 2020 елда ТР да 1 кешегә 1 кв. метр торак төзү максат итеп куелган.

Кама сәнәгать узелы Татарстан икътисадының икътисади үсеш ноктасы булып тора, дип билгеләп үтте Рөстәм Миңнеханов. Түбән Кама нефть химиясе, Чаллы автосәнәгате, “Алабуга” МИЗ, “Танеко” комплексы зур күләмдә продукция җитештерә һәм әйләнә-тирә мохиткә зур йогынты ясый. Шул сәбәпле, беренче планга экология мәсьәләсе чыгарыла. Заманча технологияләр экология куркынычсызлыгын тәэмин итәргә мөмкинлек бирә, аларны предприятиеләргә актив кертергә кирәк.

ТР Президенты фикеренчә, кече бизнесны үстерүнең комплекслы программасын булдырырга кирәк. Моның өчен Түбән Камада уникаль мөмкинлекләр бар – кече бизнес эре предприятиеләр чыгара торган продукция номенклатурасы базасында үсеш алырга мөмкин. Мондый көндәшлелеккә ия өстенлекләр башка беркайда да юк.

Республика башлыгы район активын Түбән Каманың 2010 ел күрсәткечләре буенча беренче урын алуы белән котлады.

Аның сүзләренә караганда, районга авыл хуҗалыгы тармагы буенча гына тәнкыйть сүзләре белдерергә мөмкин. 5 елда авыл хуҗалыгы предприятиеләре продукциясе күләме 4,7 проценттан 2,5 процентка кадәр кимегән. 2010 елда районда мөгезле эре терлек баш саны 10 процентка кимегән. Район шәхси хуҗалыклар буенча ТР да 35 нче урынны били.

“Гаилә фермалары оештыру программасында актив катнашырга кирәк”, - дип күрсәтмә бирде ТР Президенты.

Рөстәм Миңнеханов үз чыгышын тәмамлаганда, түбәнкамалыларга 2010 елда башкарган эшләре өчен рәхмәт белдерде һәм 2011 елга куелган бурычларны гамәлгә ашыруда уңышлар теләде.