Рөстәм Миңнеханов: “IT мөмкинлекләре чиксез, һәм без аларны үзебезнең эштә кулланачакбыз”

“Электрон Хөкүмәт” системасын үстерү буенча Татарстан тәҗрибәсе хакында бүген ТР Президенты Рөстәм Миңнеханов федераль массакүләм мәгълүмат чаралары вәкилләренә алар белән булган очрашу вакытында сөйләде.

Президентның бүген Казанга пресс-тур белән килгән телевидение тапшыруларын алып баручы Тина Канделаки җитәкчелегендәге федераль ММЧ делегациясе белән очрашуында ТР Премьер-министры урынбасары – мәгълүматлаштыру һәм элемтә министры Николай Никифоров, Республика матбугат һәм массакүләм коммуникацияләр агентлыгы җитәкчесе Марат Моратов катнашты, дип хәбәр итә ТР Президенты матбугат хезмәте.

Сөйләшү башында ук Рөстәм Миңнехановка үзләре белән очрашып, Россиянең мәгълүматлаштыру мәсьәләсендә иң алга киткән төбәкләренең берсе булган республика җитәкчесенә сораулар бирү мөмкинлеге табылган өчен Тина Канделаки рәхмәт белдереп: “Сез башка регионнарны күп яктан узып киттегез һәм булган осталык-тәҗрибә җимешләрегез белән бик теләп бүлешәсез, - дип Р.Миңнехановка мөрәҗәгать итте. – Һәм шуны бик беләсе килә: ни рәвешле яңа технологияләр кертү мөмкин булды, һәм шуның нәтиҗәсе нинди?”

Рөстәм Миңнеханов сүзләренчә, Татарстан җитәкчелеге IT-технологияләрне дәүләт идарәсенә кертү нәтиҗәләреннән ахыргача канәгать түгел, республикага әле шактый эшлисе бар. “IT-технологияләр мәгълүматны тиз арада тапшырырга мөмкинлек бирә, шуның белән оперативлык арта, аралашуны гадиләштерә. 2005 елда IT-технологияләр кертеп җибәрү турында карар кабул иткәндә бу безнең өчен төп мәсьәләгә әйләнде”, - диде Р.Миңнеханов.

ТР Президенты сүзләренчә, хәзерге вакытта Татарстанда дәүләт һәм муниципаль хезмәтләрне электрон рәвештә күрсәтүне оештыру IT-тармак өчен яңа бурыч булып тора. “IT-технологияләр - ул модага иярү түгел: алар гражданнарга хезмәт күрсәтүне гадиләштерә һәм коррупция мөмкинлекләрен кыскарта, - дип саный Р.Миңнеханов. - IT-технологияләр үсеше чиксез булачак, без кайчан да булса ахырына кадәр җитәрбез дип әйтергә ярамый: IT мөмкинлекләре чиксез, һәм без аларны үзебезнең эштә кулланачакбыз”, - дип басым ясап әйтте Президент. Шул ук вакытта, Татарстан җитәкчесе сүзләренчә, республика җитәкчелеге шуның кебек яңа мөмкинлекләрнең федераль дәрәҗәдә дә булуын тели.

Рөстәм Миңнеханов журналистларга “Электрон Хөкүмәт” системасының күп кенә техник заданиеләрен аның үзе тарафыннан бирелүен, моның уңайлы һәм сервисларын кулланганда гадилеге әһәмиятле булуын белдерде.

Тина Канделакиның, Татарстан үзенең “Электрон Хөкүмәт” өлкәсендәге эшкәртмәләрен башка регионнарга да бирәме, дип кызыксынуына Николай Никофоров, Татарстан программа тәэмин ителешен әзерләүчеләр хәзер үк тә Россия Федерациясенең күп кенә субъектлары белән эшли, дип белдерде.

Очрашу барышында журналистлар Татарстан Президенты белән республикада мәгариф үсеше мәсьәләсе буенча да фикер алышты. Р.Миңнеханов югары белем бирүнең сыйфатын күтәрү зарурлыгына басым ясады. Моннан тыш, мәгариф системасы нәкъ менә хезмәт базарында ихтыяҗ булган белгеләр әзерләргә тиеш. Шулай ук, Президент республикада тормышка ашырыла торган “Электрон мәгариф” программасы хакында да аңлатма бирде.

Федераль ММЧ делегациясе бүген IT-паркта булып, анда тәкъдим ителгән “Электрон Хөкүмәт” һәм “Электрон мәгариф” өлкәсендәге эшкәртмәләр белән якыннан таныша.