Рөстәм Миңнеханов:“Һәр объектта һөнәри әзерлекле, аттестация узган кешеләр генә эшләргә тиеш”

Узган ел республикада производстволарда 105 кешенең гомере өзелгән. Эш урыннарында бәхетсезлек очракларына юлыгып һәлак булучыларның күбесе төзелештә күзәтелгән. “Моның сәбәпләрен җентекләп ачыклап, аннан сабак алып һәм төпле нәтиҗәләр ясап, алга таба мондый бәхетсезлекләргә юл куярга ярамый”. Бүген Ростехнадзорның Идел буе идарәсенең коллегия утырышында катнашкан ТР Президенты Рөстәм Миңнеханов шулай дип белдерде. Коллегия утырышы “2010 елда энергетика һәм сәнәгать иминлегенең торышы һәм аны күтәрү буенча 2011 елга бурычлар” дигән темага багышланган иде.

Президент белдергәнчә, Татарстан индустриаль төбәк. Республикада “Түбән Кама нефтехим”, “Казан оргсинтез” кебек һәр агрегаты потенциаль куркыныч тудырган производстволар җитәрлек. Моннан тыш, төзелешләрдә хәзер теләгән һәркем килеп эшли. “Аларның барысы да куркынычсызлык буенча инструктаж узган булырга тиеш. Мондый производстволарда һәм, гомумән, һәр объектта һөнәри әзерлекле, аттестация узган кешеләр генә эшләргә тиеш”, - дип ассызыклады республика башлыгы.

Ростехнадзорга предприятиеләрнең куркынычсызлыгын кисәтү буенча зур бурычлар йөкләнгән. “Республикада төзелүче “ТАНЕКО” комплексы, Универсиада объектлары, транспорт инфраструктурасының барысы да сездән өстәмә ныклы контроль таләп итә. “ТАНЕКО” проектын гамәлгә ашыру төзүчеләр, проектлаучылар һәм сезнең өчен зур мәктәп. Анда башкарылган эшләр тиешенчә рәсмиләштеререлергә дә тиеш. Бу эшне комплексны башкару кирәк”, - дип искәртте Президент.

Рөстәм Миңнеханов быел республикада тагын бер зур төзелеш башланачагын – “АММОНИЙ” проекты тормышка ашырылачагын җиткерде. Моңа өстәп республикада 2011 елда 2 млн. кв. метрдан артык мәйданда торакны төзеп, сафка бастырасы бар. “Бары җаваплы структураларның Ростехнадзорның Идел буе идарәсе белән аңлашып эшләве генә бу производстволарның иминлеген тәэмин итә ала”, -дип ассызыклады Президент.

Рөстәм Миңнеханов үз чыгышында узган ел Татарстан ирешкән төп социаль –икътисади үсеш күрсәткечләренә тукталып, алар арасыннан төп капиталга җәлеп ителгән инвестицияләр күләменең 306 млрд. сумга җитүен аерым билгеләп үтте. “Бу саннар артында Ростехнадзор идарәсе бүлекчәләренең дә зур өлеше тора”, - ди ул. Республика башлыгы башкарган эшләр өчен Идел буе идарәсе коллективына рәхмәт сүзләрен җиткереп, иминлек мәсьәләсенең өстенлекле бурыч булырга тиешлеген искәртте. “Сездән күп әйберләрне күзәтергә генә түгел, алдан ук кисәтеп кую да сорала. Көчләрне берләштереп, агымдагы елда тагын да нәтиҗәлерәк эшләрбез”,- дигән ышаныч белдерде Рөстәм Миңнеханов.