ЯҢАЛЫКЛАР

Көнчыгыш Азәрбайҗан провинциясе (Иран Ислам Республикасы) Татарстан Республикасы территориясендә авыр һәм җиңел тракторлар җитештерүгә инвестицияләр кертү, нефть химиясе өлкәсендә уртак проектлар булдыру, Татарстан һәм Иран университетлары арасындагы хезмәттәшлекне җайга салу, шулай ук Казан һәм Тәбриз шәһәрләре арасында туры һава юлларын ачу мөмкинлекләрен карый.
Бу турыда бүген Татарстан Республикасы Министрлар Кабинетында Татарстан Премьер-министры Рөстәм Миңнеханов белән булган очрашуда Көнчыгыш Азәрбайҗан (Иран) губернаторы Әхмәт Әлириза Биги хәбәр итте.

Атна дәвамында Татарстан Республикасы Кече һәм урта эшмәкәрлекне үстерү комитеты, “Мастер” Кама индустриаль паркының идарә компаниясе, Яр Чаллы администрациясе “Мастер” КИПы мәйданында икътисади хәлне тотрыклыландыру өчен, алдан кайбер чаралар күрергә тиеш.
Бу турыда кичә, 14 нче гыйнварда, “Мастер” КИПының җитештерү мәйданнарын карап чыгуга ук, Татарстан Республикасының беренче вице-премьеры Равил Моратов әйтте.

Кичә, 14 нче гыйнварда, Татарстан Премьер-министры Рөстәм Миңнеханов эш визиты белән Мәскәүдә булды.
Визит кысаларында Татарстан Республикасы Премьер-министры Рөстәм Миңнеханов Россиянең элемтә һәм массакүләм багланышлар министры Игорь Щеголев белән очрашты. Анда Татарстанда югары технологияләр өлкәсендәге парк (ИТ-парк һәм “Химград” технополисы) төзү проектларын тормышка ашыру, “Татарстан Республикасының Электрон Хөкүмәте” комплекслы проекты кысаларында дәүләти һәм муниципаль хезмәт күрсәтүгә күчү мәсьәләләре турында фикер алыштылар.

Узган ел Татарстанның хөкем приставлары хезмәте өчен бер үк вакытта авыр да, уңышлы да булды. Федераль закон нигезендә хөкем приставларының вәкаләтләре киңәйтелде. Шул ук вакытта Идарә хезмәткәрләренә план буенча күздә тотылган бөтен күрсәткечләргә ирешү насыйп булды.
Татарстан Республикасы буенча Хөкем приставлары федераль хезмәте Идарәсенең йомгаклау коллегиясе утырышы бүген Казанда узды. Утырыш эшендә Татарстан Республикасы Премьер-министры Рөстәм Миңнеханов катнашты.

2009 ел ахырына Татарстан Республикасында рәсми рәвештә теркәлгән эшсезләр саны, фаразлаулар буенча, якынча 61 мең кеше булырга мөмкин. Бу турыда бүген Татарстан Республикасы Министрлар Кабинетында узган традицион брифингта Татарстан Республикасының хезмәт, эш белән тәэмин итү һәм социаль яклау министры Айрат Шәфигуллин хәбәр итте.  2009 елның 1 нче гыйнварына республика буенча рәсми рәвештә теркәлгән эшсезләр саны 25,5 меңгә җиткән.

Федераль Хөкүмәт икътисадның реаль секторына, шул исәптән төзелеш өлкәсенә дә акча керүне тәэмин итү өчен, кирәкле чаралар күрергә тиеш. Бу турыда бүген Татарстан Республикасы Төзелеш, архитектура һәм торак-коммуналь хуҗалык министрлыгының йомгаклау коллегиясендә Татарстан Республикасы Премьер-министры Рөстәм Миңнеханов хәбәр итте.
Татарстан Хөкүмәте башлыгы республикада кайбер зур объектлар – “Алабуга” махсус икътисади зонасы, Түбән Камадагы Нефть химиясе һәм нефть эшкәртү заводлары комплексы, “Аммоний” ААҖ проекты (Менделеевск) төзелешен, шулай ук күпфатирлы торак йортларга капиталь ремонт ясау программасын тормышка ашыруны дәвам итү нияте барлыгын раслады.

2009 елда Татарстан Республикасында якынча 2 млн. кв. метр торак төзү күздә тотыла. Шуларның якынча 800 мең кв. метрын (ягъни 40 % ын) социаль ипотека республика программасын тормышка ашыру кысаларында төзелә торган торак тәшкил итәчәк. Бу турыда бүген Татарстан Республикасы Төзелеш, архитектура һәм торак-коммуналь хуҗалык министрлыгының узган елга нәтиҗә ясау буенча үткәрелгән коллегиясендә ведомство башлыгы Марат Хөснуллин хәбәр итте.
Йомгаклау коллегиясе республиканың барлык муниципаль районнары катнашында видеоконференцэлемтә режимында узды.

2008 ел нәтиҗәләре буенча, Татарстан Республикасында теркәлгән гражданлык хәле актларының гомуми саны 148734 кә җиткән, бу 2007 ел күрсәткеченнән 0,9 процентка югары. Бүген Гражданлык хәле актларын теркәү идарәсе коллегиясенең киңәйтелгән утырышында бу турыда ведомство җитәкчесе Эльмира Маврина әйтте.

Бүген Татарстан Республикасы Министрлар Кабинетындагы Гражданлык хәле актларын теркәү идарәсе коллегиясенең киңәйтелгән утырышында Татарстан Республикасы Премьер-министры Рөстәм Миңнеханов Татарстан Республикасында 2008 елда аерылышулар статистикасына җентеклерәк анализ ясарга тәкъдим итте.

Бүген Татарстан Республикасы Министрлар Кабинетында Татарстанның икътисад министры Марат Сафиуллин 2008 елда Татарстан Республикасы социаль-икътисади үсешенең якынча нәтиҗәләрен әйтте.
“2004-2007 елларда Татарстанда күзәтелгән югары икътисади үсеш темпы 2008 елның тенденцияләрен билгеләде. Ел ахырында дөньякүләм финанс кризисының тәэсире сизелә башласа да, без 2008 елны шактый яхшы күрсәткечләр белән тәмамлый алдык”, - диде Марат Сафиуллин.