Рөстәм Миңнеханов Казахстанның бизнес-даирә делегациясе белән очрашты

Бүген Татарстан Республикасы Президенты Рөстәм Миңнеханов Казанга “Атамекен” берлеге НЭРК Президиумы рәисе Тимур Кулибаев, “КазРосГаз” генераль директоры Кайрат Боранбаев һ.б. составында килгән Казакъстан делегациясе белән очрашты.

Казакъстан Татарстанның төп партнерларының берсе, дип билгеләп үтте Рөстәм Миңнеханов очрашуда. Без анда машина төзелеше продукциясе, юу әйберләре, нефть продуктлары һәм безнең республикада җитештерелә торган башка нәрсәләрне җибәрәбез. Татарстанда гамәлгә ашырыла торган төп проект – ул “КАМАЗ”, дип ассызыклады ТР Президенты. “КАМАЗ” Казакъстан базарында үсеш алу өчен яхшы перспективага ия дип саныйбыз, - ди Р.Миңнеханов.

Шулай ук республика башлыгы Татарстанда машина төзелешеннән башка авиатөзелеш дә алга киткән дип искәртте. “Казакъстан базарына вертолет продукциясен кертү зур перспективага ия”, - дип билгеләп үтте Р.Миңнеханов.
Моннан тыш, Казакъстан делегациясе Казанда сәфәрдә булганда нефть химиясе тармагында Татарстан белән Казакъстан мөнәсәбәтләре буенча фикер алышырга телибез, дип белдерде ТР Президенты. Татарстан каучук, полимер җитештерү буенча Россиядә беренче урынны били, дип искәртте Рөстәм Миңнеханов.

“Бу өлкәдә Россия компанияләре белән мөнәсәбәтләрнең тарихы бай, - дип белдерде республика башлыгы. – Бүген Казакъстанның нефть химиясен үстерү мәсьәләләренә җитди каравын беләбез. Бу юнәлештә Татарстан яхшы партнер була алыр иде, дип саныйм. Бүгенге очрашуда сезгә безнең проектлар һәм планнар турында сөйләячәкбез”.

ТР Президенты Иннополис махсус икътисади зонасы турында сөйләде. “Казан белән янәшә ИТ-шәһәр төзү безнең бурыч”, - дип аңлатты Р.Миңнеханов.

Шулай ук ТР Президенты Казакъстанның Генераль консуллыгы ачылу турындагы карар кабул ителүен, ә ул уртак проектларны һәм планнарны гамәлгә ашыруны активлаштырачак, дип ассызыклады.

“Казакъстан хезмәттәшләребездән күп нәрсәгә өйрәнәбез. Казакъстанда һәр сәфәрдә тәҗрибә туплап кайтабыз”, - дип билгеләп үтте Рөстәм Миңнеханов.