ЯҢАЛЫКЛАР

Республикабызның “Татарстан Республикасының Электрон Хөкүмәте” комплекслы проектын кертүдәге уңышлы тәҗрибәсе Лондонда бара торган Бөтендөнья алдынгы технологияләр форумында югары бәяләнгән. Британия технология һәм электрон коммерция институтының “Электрон Хөкүмәт ярдәмендә уңышлы идарә итү” исемле премиясен («Award of British institute of technologies and E-commerce») Татарстан Республикасы Премьер-министры Рөстәм Миңнехановка лорд Әхмәт Роттерхамский тапшырган. Бүген бу турыда журналистларга биргән интервьюсында тышкы икътисади эшчәнлек буенча Татарстан Республикасы хөкүмәт башлыгының ярдәмчесе Искәндәр Мөфлиханов әйткән. Моннан тыш, Британия институтының “Технологияләр өлкәсендә лидер” дигән премиясенә 2000 елда физика өлкәсендә Нобелев премиясе лауреаты булган Жорес Алферов лаек булган.

Бүген Татарстан Республикасы Премьер-министры Рөстәм Миңнеханов “Вести24” Россия мәгълүмат каналыннан туры эфирда трансляцияләнгән матбугат конференциясендә катнашты.
Матбугат конференциясе 22 нче – 25 нче октябрьдә Казанда “Россия – спорт державасы” I Бөтенроссия форумын оештыру һәм үткәрүгә багышланган иде.
Әлеге чара ике урыннан: Бөтенроссия дәүләт телерадиокомпаниясенең Мәскәүдәге матбугат үзәгеннән һәм Казандагы студиясеннән трансляцияләнде.

2009 елның якынча нәтиҗәләренә караганда, Татарстан Республикасы тулай төбәк продуктының күләме – 877 млрд. сум, сәнәгый җитештерү күләме – 750 млрд. сум тәшкил итәргә мөмкин. Бүген Татарстан Республикасы Министрлар Кабинеты утырышында бу турыда Татарстан Республикасының икътисад министры Марат Сафиуллин хәбәр итте.

Татарстан Республикасы Финанслар министрлыгының алдан фаразлауларына караганда, 2010 елда Татарстан Республикасының консолидацияләнгән бюджетына 88,3 млрд. сум керәчәк (шул исәптән үз керемнәребез – 80 млрд. сум).
Татарстан Республикасы бюджетына 66,1 млрд. сум керергә тиеш (шул исәптән үз керемнәребез – 57,8 млрд. сум).
Бүген Татарстан Республикасы Министрлар Кабинеты утырышында Татарстанның финанслар министры Радик Гайзатуллин шундый саннар китерде.

Бүген Татарстан Республикасы Премьер-министры Рөстәм Миңнеханов республикабызның бөтен педагогларын Укытучылар көне белән котлады.
Укытучыларны котлау тантанасы “Корстон” мәдәни-күңел ачу комплексында (Казан) узды.

Бүген Премьер-министр Рөстәм Миңнеханов җитәкчелегендәге Татарстан Республикасы делегациясе, “Алтын балдак” IV халыкара туку-сәнәгать форумында катнашу максатыннан, эш визиты белән Иваново өлкәсенә (Ивановога) килде.
Визит барышында Татарстанның хөкүмәт башлыгы Рөстәм Миңнеханов Иваново өлкәсе губернаторы Михаил Мень белән очрашты, форумны ачу тантанасында (ул Ивановоның Сәнгать сараенда уза) катнашты.

Кичә, 1 нче октябрьдә, Татарстан Республикасы Премьер-министры Рөстәм Миңнеханов Татарстан Республикасының Хөкүмәт йортында Россия кинематографистлар союзы рәисе, режиссер Никита Михалков белән очрашты.
Анда региональ һәм милли кинематографны үстерү һәм, аерым алганда, “Алтын мөнбәр” халыкара мөселман кинофестивале турында сүз барды.

Казанның В.И.Шимко исемендәге “Радиоэлектрон системалар һәм мәгълүмати технологияләр буенча федераль фәнни-җитештерү үзәге” федераль дәүләт унитар предприятиесендә яңа җитәкче билгеләнде. Бүген Татарстан Премьер-министры Рөстәм Миңнеханов һәм “Радиоэлектрон технологияләр” концерны” ААҖ җитәкчесе Николай Колесов предприятие коллективына яңа директорны – Владимир Конновны тәкъдим итте.

Татарстанда Торак-коммуналь хуҗалыкны төзекләндерүгә ярдәм итү фондының программасы буенча үткәрелә торган капиталь ремонт эшләре төгәлләнгән. Бүген Министрлар Кабинетында Хөкүмәт башлыгы Рөстәм Миңнеханов үткәргән киңәшмәдә бу турыда республикабызның төзелеш, архитектура һәм торак-коммуналь хуҗалык министры Марат Хөснуллин әйтте.

Бүген Премьер-министр Рөстәм Миңнеханов җитәкчелегендәге Татарстан Республикасы делегациясе дүртенче Россия-Сингапур эшлекле форумы (Russian-Singapore Business Forum) эшендә катнашты.
Форум “Шангрила” кунакханәсендә узды. Оештыручыларның сүзләренә караганда, анда Россия бизнес-ширкәтләренең гадәттәгедән тыш күп вәкилләре җыелган.