ЯҢАЛЫКЛАР

Бүген Татарстан Республикасы Премьер-министры Рөстәм Миңнеханов “Россия – спорт державасы” исемле спорт форумының йомгаклау пленар утырышында катнашты. Шуны искәртик: беренче Бөтенроссия спорт форумы 22 нче – 25 нче октябрьдә Казанда (“Корстон” мәдәни-күңел ачу комплексы) уза.
Утырышны Россия Хөкүмәте вице-премьеры Александр Жуков ачып җибәрде. Ул Казанда форумның иң югары дәрәҗәдә оештырылуын һәм үткәрелүен билгеләп үтте. “Форум Россиянең спорт хәрәкәтендә сизелерлек этап булды”, - диде ул.
Россиянең спорт, туристлык һәм яшьләр сәясәте министры Виталий Мутко Россиядә спорт форумының ел саен үткәрелә торган традицион вакыйгага әвереләчәген әйтте. Ул шулай ук бүгенге форумда Россия Президенты Дмитрий Медведев катнашу сәбәпле, анда карала торган бөтен мәсьәләләрне дә тормышка ашыру мөмкинлеге булуын билгеләп үтте.
Форумда катнашучылар алдында чыгыш ясап, Татарстан Премьер-министры Рөстәм Миңнеханов, үз чиратында, форумның Россиядә яңа вакыйга булуын әйтте. Аның сүзләренчә, Россия Президенты Указы (“Россия – спорт державасы” форумын үткәрү турында) барыбызның да спортка мөнәсәбәтен үзгәрткән, хакимият һәм бизнес бу мәсьәләләргә - физик культура үсешенә, профессиональ спортка – башкача карый башлаган.

Бүген Казанда Татарстан Республикасы Премьер-министры – “Татнефть” ААҖ нең Директорлар советы рәисе Рөстәм Миңнеханов компаниянең чираттагы Директорлар советы утырышын үткәрде.
Анда “Татнефть” ААҖ нең тугыз айда бюджетны үтәү нәтиҗәләре каралды һәм агымдагы елның ноябренә бюджет расланды.

Казанда 2013 ел Универсиадасына спорт объектларын төзү мондый темплар белән барса, спорт бәйрәмен үткәрүгә бер ел кала шәһәр аңа 100 процент әзер булачак. Бу турыда журналистларга Россия Федерациясенең Исәп-хисап палатасы рәисе Сергей Степашин әйтте. Ул Татарстан башкаласына “Россия – спорт державасы” Бөтенроссия спорт форумында катнашу өчен килгән.

Бүген Татарстан Республикасы Премьер-министры Рөстәм Миңнеханов “Люксембургның финанс структуралары һәм чаралары” семинарын ачу тантанасында катнашты. Чара “Корстон” мәдәни-күңел ачу үзәгендә булды. Ул банк өлкәсенең финанс һәм юридик бүлекчәләре, Татарстан Республикасының зур компанияләре җитәкчеләре һәм башлыкларын, юридик һәм финанс консультантларын үзенә җыйды.
Семинарда шулай ук Татарстан Республикасының сәнәгать һәм сәүдә министры Равил Зарипов, “Татнефть” ААҖ нең генераль директоры Шәфәгать Тәхаветдинов, Татарстан Республикасының Милли банкы рәисе Евгений Богачев, Татарстан Республикасы Предприятиеләр һәм эшмәкәрләр ассоциациясе президенты Александр Лаврентьев һәм башкалар катнашты.

Бүген Татарстан Республикасы Министрлар Кабинетында узган брифингта Татарстан Республикасының яшьләр эшләре, спорт һәм туристлык министры Марат Бариев “Россия – спорт державасы” Бөтенроссия форумына әзерлек турында сөйләде.
Шуны искәртик: форум 22 нче октябрьдә ачылачак, чарада якынча 1700 кеше катнашыр дип көтелә. Федерация субъектларының 20 губернаторы һәм җитәкчесе, Россия Хөкүмәтенең 10 әгъзасы һ.б. үзләренең әлеге чарада катнашачакларын раслаган инде.
Конгресс форматында узачак форумны ачу тантанасында Россия Президенты Дмитрий Медведев чыгыш ясаячак.

Татарстан Республикасының машина төзелеше комплексында 2009 елның 9 аенда җитештерелгән продукция күләме 120 млрд сум, ягъни республикадагы сәнәгый җитештерү күләменең якынча 20 процентын тәшкил иткән. Бүген Татарстан Республикасы Сәнәгать һәм сәүдә министрлыгы һәм Татарстан Республикасы Предприятие һәм эшмәкәрләр ассоциациясе коллегиясенең уртак утырышында бу турыда Татарстан Республикасы Премьер-министры Рөстәм Миңнеханов әйтте.
Чара “Казан” милли-мәдәни үзәгендә узды. Ул Татарстан Республикасы машина төзелеше комплексының торышы һәм үсеш перспективаларына багышланган иде.

Бүген Татарстан Республикасы Хөкүмәт йортында Премьер-министр Рөстәм Миңнеханов Россия элемтә һәм массакүләм коммуникацияләр министрының урынбасары Александр Жаров, Элемтә, мәгълүмати технологияләр һәм массакүләм коммуникацияләр өлкәсендә күзәтчелек итү федераль хезмәте җитәкчесе Сергей Ситников һәм “Россия теле- һәм радиотапшырулар челтәре” федераль дәүләт унитар предприятиесе генераль директоры Алексей Малинин белән очрашты.
Анда 2013 елгы Бөтендөнья җәйге студентлар уеннарын (Универсиаданы) трансляцияләүне оештыру һәм яңа буын элемтә челтәрләрен, шул исәптән WiMAX ны үстерү турында сүз барды.

CNews үткәргән “Дәүләт секторындагы иң яхшы ИТ-проект - 2009” конкурсының нәтиҗәләре буенча, Татарстан Республикасында тормышка ашырылган проектлар берьюлы берничә номинациядә җиңеп чыккан.
Проектлар экспертларның бәяләүләре буенча иң күп балл җыйган.
Шуны искәртик: “Дәүләт секторындагы иң яхшы ИТ-проект – 2009” конкурсы “Дәүләт хакимияте органнарында мәгълүмати технологияләр” еллык күзәтүен әзерләү кысаларында CNews Analytics агентлыгы тарафыннан үткәрелде.

Татарстан Республикасының барлык муниципаль берәмлекләрендә җылыту сезонын башлау турында карар кабул ителгән, якынча 40 мең күпфатирлы йорт җылылык бирүгә тулысынча әзер. Бүген Татарстан Республикасы Министрлар Кабинетында узган брифингта бу турыда Татарстан Республикасы төзелеш, архитектура һәм торак-коммуналь хуҗалык министрының беренче урынбасары Раузил Хаҗиев хәбәр итте.

Бүген Казанда Идел-Нократ Дәүләт проба күзәтчелеге инспекциясе участогы ачылды. Әлеге чарада Татарстан Республикасы Премьер-министры Рөстәм Миңнеханов, Россия Федерациясе Дәүләт Думасының беренче вице-спикеры Олег Морозов, Россия дәүләт проба палатасы җитәкчесе вазыйфаларын башкаручы Борис Борисов катнашты.