ЯҢАЛЫКЛАР

Татарстан Республикасы Кече һәм урта эшмәкәрлекне үстерү комитеты һәм коммерция банклары – кече эшмәкәрлек субъектларына ташламалы шартларда кредит бирү программасында катнашучылар – килешүгә кул куячаклар. Әлеге документ кысаларында Татарстанда кече һәм урта эшмәкәрлекне үстерү өчен максатчан кредитлар бирү шартлары алдан килешеп куелачак.
Бүген Татарстан Республикасы Министрлар Кабинетында Татарстан Хөкүмәте башлыгы Рөстәм Миңнеханов үткәргән киңәшмәдә шундый карар кабул ителде.

Бүген, 21 нче гыйнварда, Минскида Белоруссия Республикасы һәм Татарстан Республикасы (Россия) арасында 2009-2010 елларга хезмәттәшлекне үстерү чараларының хөкүмәтара беркетмәсенә кул куелды. Документка Татарстан Республикасы Премьер-министры Рөстәм Миңнеханов һәм Белоруссия Республикасы Премьер-министры Сергей Сидорский кул куйды.
2009-2010 елларга Татарстан һәм Белоруссия Республикасы арасында хезмәттәшлекне үстерү чаралары беркетмәсе ике якның да товар әйләнеше күләмен арттырырга, шулай ук хезмәттәшлек мөмкинлекләрен киңәйтергә мөмкинлек бирер дип уйланыла.

Бүген, 21 нче гыйнварда, Гомельдә Татарстан Республикасы (Россия) һәм Гомель өлкәсе (Белоруссия Республикасы) арасында сәүдә-икътисади, фәнни-техник һәм мәдәни өлкәләрдә хезмәттәшлек итү турындагы беркетмәгә кул куелды. Документка Татарстан Премьер-министры Рөстәм Миңнеханов һәм Гомель өлкәсе башкарма комитеты рәисе Александр Якобсон кул куйды.
Шуны искәртик: 21 нче гыйнвар иртәсендә Рөстәм Миңнеханов җитәкчелегендәге Татарстан Республикасы делегациясе ике көнлек эшлекле визит белән Белоруссия Республикасына китте.

Гыйнварның 20 көне эчендә Татарстан Республикасында эшсез калган яки төп эш урыны буенча тулы булмаган эш көнен генә эшләгән 367 кеше җәмгыять эшләренә җибәрелде. Бу турыда бүген тормыш сыйфатын арттыру һәм керемнәрне легальләштерү буенча республика ведомствоара комиссиясе утырышында Татарстан Республикасының хезмәт, эш белән тәэмин итү һәм социаль яклау министры Айрат Шәфигуллин хәбәр итте. Республика комиссиясе утырышын Татарстан Республикасы Премьер-министрының беренче урынбасары – комиссия рәисе Равил Моратов үткәрде.

Бүген Татарстан Республикасы буенча Дәүләт статистикасы федераль хезмәте һәм Татарстан Республикасы Социаль-икътисади мониторинг комитеты территориаль органының йомгаклау коллегиясендә чыгыш ясаганда, Татарстан Республикасы Премьер-министры Рөстәм Миңнеханов дәүләт статистикасы органнары эшендә заманча мәгълүмати технологияләрнең ролен югары бәяләде.
Аның сүзләренә караганда, хәзерге шартларда статистик мәгълүматларның әһәмияте һәм роле ел саен арта бара. “Дөньякүләм икътисади кризис шартларында социаль-икътисади күрсәткечләр турында оператив һәм ышанычлы мәгълүматка ия булу аеруча мөһим”, - дип саный Татарстан Хөкүмәте башлыгы.

Бүген Татарстан Республикасы буенча Россия Федерациясе Пенсия фонды бүлеге башлыгы Марсель Имамов, әниләр капиталыннан файдалануга бәйле рәвештә, законнарга кертелгән үзгәрешләр турында җентекләп сөйләп бирде.
Ул 2007 елның 1 нче гыйнварыннан әниләр капиталына дәүләт сертификатының икенче бала тапкан яки икенче баланы тәрбиягә алган хатын-кызларга һәм, элек дәүләт ярдәменең өстәмә чараларына булган хокуктан файдаланмаган булсалар, өч яки аннан да күбрәк бала тапкан яки тәрбиягә алган хатын-кызларга бирелүен искәртте.

2009 елда Татарстанда пар казаннары биналарында эшләнеп чыга торган җылылык энергиясенең халыкка дигән өлешенә тарифларны киметү мәсьәләсе яңадан каралган. Бу турыда бүген Татарстан Республикасы Министрлар Кабинетында узган брифингта Тарифлар буенча Татарстан Республикасы комитеты рәисе Марина Фәйрушина хәбәр итте.

Авыр икътисади хәлгә карамастан, Татарстан Республикасында инновацион эшчәнлек дәвам итәргә тиеш. Бу турыда бүген Татарстан Республикасы Министрлар Кабинетында Россия венчурлы инвестицияләр ассоциациясенең башкарма директоры Альбина Никконен белән булган очрашуда Татарстан Хөкүмәте башлыгы Рөстәм Миңнеханов әйтте.
Татарстан Республикасы Премьер-министры фикеренчә, республикада инновацион проектларны тормышка ашыру өчен төзелгән инфраструктура икътисадка кризистан җиңел чыгарга һәм производствоның конкурентлылыгын тәэмин итәргә булышырга тиеш.

Бүген ведомствоның йомгаклау коллегиясендә Татарстан Премьер-министры Рөстәм Миңнеханов Татарстан Республикасы Урман хуҗалыгы министрлыгы эшендә урман ресурсларын карауның яңа технологияләрен кулланырга чакырды.
Аның сүзләренә караганда, бүген Татарстан Республикасы Урман хуҗалыгы министрлыгы эшендә “инновацияләргә дә урын бирелергә тиеш”.

Бүген республика Хөкүмәтенең беренче вице-премьеры Равил Моратов “Өй эчендәге газ җиһазларын эшләтү куркынычсызлыгын тәэмин итү һәм магистраль газүткәргечләр күчәре белән ике арадагы рөхсәт ителгән ара калдыру тәртибен бозу турында” дигән темага Татарстан Республикасы Гадәттән тыш хәлләрне кисәтү, бетерү һәм янгын куркынычсызлыгын тәэмин итү комиссиясе утырышын үткәрде. Утырышта газ приборларын куллану вакытында барлыкка килә торган гадәттән тыш хәлләрне кисәтү алымнары турында фикер алыштылар.