ЯҢАЛЫКЛАР

Татарстан Президенты Рөстәм Миңнеханов авыр атлетика буенча Россия яшьләр җыелма командасы баш тренеры Николай Колесников һәм авыр атлетика буенча Россиянең атказанган спорт мастеры Светлана Шимкованы авыр атлетика буенча дөнья чемпионатында җиңүе белән котлады, дип хәбәр итә ТР Президентының матбугат хезмәте.

Татарстанда 2020 елга кадәр торак төзелешен үстерү программасының гомуми бәясе 430 миллиард сум тәшкил итәчәк. Мондый мәгълүмат бүген Мәскәүдә “Россия гражданнарына – арзан һәм уңайлы торак” өстенлекле илкүләм проектын гамәлгә ашыру буенча Координацион совет утырышында белдерелде. Утырышны РФ төбәк үсеше министры Виктор Басаргин алып барды.

Совет утырышының төп темасы Татарстанда торак төзелешен үстерү комплекслы программасын тәкъдим итү һәм яклау иде. Программаны Татарстан Президенты Рөстәм Миңнеханов һәм ТР төзелеш, архитектура һәм торак-коммуналь хуҗалык министры Марат Хөснуллин тәкъдим итте. Утырышта Россиянең 13 төбәгеннән вәкилләр, федераль үсеш институтлары җитәкчеләре катнашты.

Бүген ТР Министрлар Кабинеты Президиумы утырышында ТР Премьер-министры Илдар Халиков җылыту сезонына әзерлек мәсьәләсенә игътибарны юнәлтте. Аның сүзләренчә, республикада булган 3616 котельныйның бүгенгә 724есе генә эшләтеп җибәрелгән, нибары 8 муниципаль берәмлектә генә җылыту сезонын башлау турында карар кабул ителгән, ләкин әлегә Апас районында гына котельныйлар тулысынча эшли.

Бүген ТР Министрлар Кабинеты Президиумының быел җәйге чорда гадәттән тыш хәлләрне кисәтү, бетерү подсистемасы һәм гражданнар оборонасы системасы башкарган эшкә нәтиҗә чыгаруга багышланган утырышында Татарстанда булган гадәттән тыш хәл шартларындагы эш йомгаклары буенча Россия Гадәттән тыш хәлләр министрлыгының ТР буенча идарәсе башлыгы – ТР гражданнар оборонасы һәм гадәттән тыш хәлләр министры Рәфис Хәбибуллин хисап тотты.

Үзара хезмәттәшлек мәсьәләләре турында бүген ТР Хөкүмәт Йортында ТР Президенты Рөстәм Миңнеханов һәм халыкара эшкуарлар Ассоциациясе президенты, 17нче чакырылыш Израиль Кнессеты депутаты Леонид Литинецкий сөйләште.

Сүз авыл хуҗалыгы өлкәсендә хезмәттәшлек итү турында да барды.

Бүген Татарстан Республикасы Президенты Рөстәм Миңнеханов Россия Федерациясе Хисап палатасы аудиторы Сергей Агапцов белән очрашты. Очрашу ТР Хөкүмәте йортында узды.

Искәртеп үтәбез, Сергей Агапцовның Казанга визиты 2013 елгы Универсиадага әзерлек барышында Хисап палатасы тарафыннан федераль бюджет субсидияләренең кулланылышын тикшерү эшләренең төгәлләнүе белән бәйле.

Рөстәм Миңнеханов 2013 елгы Универсиаданы үткәрүгә әзерлек кысаларында чараларның мөһимлеген билгеләп үтте. Әлеге вакыйга Татарстан өчен генә әһәмиятле үгел, ул илебез тарихына керәчәк, диде ТР Президенты. Ул 2013 елда Мәскәүдә Универсиада үткәрелгәнгә 40 ел булачагын искәртте.

Бүген Казанда Россия Федерациясе Президентының Татарстан Республикасында кабул итү бүлмәсе (Кремль ур., 12/20) ачылды.

Бу вакыйгага багышланган чарада РФ Президентының Идел буе федераль округындагы Тулы вәкаләтле вәкиле Григорий Рапота, Татарстан Республикасы Президенты Рөстәм Миңнеханов, Татарстан Республикасы Дәүләт Советы Рәисе Фәрит Мөхәммәтшин, Татарстан республикасы буенча федераль баш инспектор Марсел Галимәрдәнов һәм башка рәсми затлар катнашты.

Бүген Татарстан башкаласындагы “Корстон” кунакханә-сәүдә-күңел ачу комплексында “Бергәләп – балалар хакына!” дигән исем белән Бөтенроссия күргәзмә-форумы эшли башлады. Авыр тормыш хәлендә калган балаларга ярдәм фонды (ул РФ Президентының 2008 елның 26 мартындагы 404 нче Указы белән булдырылган) тарафыннан һәм Татарстан Республикасы Хөкүмәте ярдәме белән оештырылган әлеге чарада фондның икееллык эшчәнлегенә беренче тапкыр нәтиҗә чыгарыла. Фонд идарәсе рәисе Марина Гордеева билгеләп үткәнчә, бу федераль күргәзмә-форум беренче тапкыр шундый зур күләмле итеп уздырыла: анда 2009 елдан фонд финанслашкан РФнең 50 субъектының 109 программасы һәм финанслаган 63 субъектының 307 проекты тәкъдим ителә, илнең 63 субъектыннан махсус килгән 360лап вәкил катнаша. Ә инде программа һәм проектларны (программа һәм проектларга 70тән артык төбәк җәлеп ителгән, фондның үзенең дә 6 программасы гамәлдә) тормышка ашыру өчен фонд (ул РФ бюджетыннан финанслана, хәйрия акчалары файдаланыла) биргән грантларның гомуми суммасы 1625 млн. сумнан артык исәпләнә.

Бүген Татарстан Президенты Рөстәм Миңнеханов ТР Министрлар Кабинетында «Intel» корпорациясе вице-президенты Джон Дейвис белән очрашты.

“Татарстанда барган соңгы вакыйгалар мәгълүматлаштыру, инновацияләр һәм ИТ-технологияләр белән бәйле. Без Россия һәм чит илләрдәге яңалыкларны күп кулланабыз”, - дип ассызыклады очрашуда Рөстәм Миңнеханов.

Татарстан Президенты фикеренчә, ИТ-технологияләрне, беренче чиратта, мәгариф системасына кертергә кирәк. Белем бирүне дөньякүләм стандартлар һәм таләпләргә җавап бирүче яңа дәрәҗәгә күтәрү зарур. Яңа технологияләрне медицинада да активрак кулланырга кирәк.

“Укытучыга – компьютер” республика проекты кысаларында Татарстанның 375 мәктәбеннән 13 меңгә якын мөгаллим ноутбук алган. Бүген ТР мәгариф һәм фән министры Альберт Гыйльметдинов Татарстан Премьер-министры Илдар Халиков рәислегендә “Электрон мәктәп” проекты буенча муниципаль берәмлек башлыклары белән видеоконференция режимында узган киңәшмәдә әнә шул хакта хәбәр итте.