ЯҢАЛЫКЛАР

Бүген Казан Кремленда ТР Президенты Рөстәм Миңнеханов белән РФ транспорт министры Игорь Левитин узган елның 10 июлендә Куйбышев су саклагычында һәлакәткә очраган “Булгария” теплоходындагыларга фидакарьләрчә ярдәм күрсәткән, үлемнән коткарган “Арабелла” теплоходы экипажы әгъзаларына дәүләт бүләкләре тапшырды.

Бүген ТР Президенты Рөстәм Миңнеханов ТР Икътисад, Сәнәгать һәм сәүдә, Энергетика министрлыкларының 2011 ел йомгакларына багышланган уртак коллегиясе утырышында республика икътисады алдында торган мөһим бурычларга тукталды. Аның ассызыклавынча, нефть, газ, нефть химиясе алга таба да Татарстан икътисадының “локомотив”ы булып калачак. Президент бу өлкәдә “ТАНЕКО” , “Аммоний” комплексларының зур роль уйнаячагын ассызыклап, үзебезнең нефтехимия предприятиеләрендә җитештерелгән полимерларның башка тармакларны үстерү өчен нигез булуын ассызыклады.

Бүген Татарстан Республикасына Россия Федерациясе транспорт министры Игорь Левитин килде. «Казан» халыкара аэропортында аны ТР Премьер-министры Илдар Халиков, ТР траснпорт һәм юл хуҗалыгы министры Ленар Сафин һ.б. каршы алды.

Бүген Казан Кремлендә Татарстан Республикасы Президенты Рөстәм Миңнеханов Бөтенроссия нәфис гимнастика федерациясе президенты Ирина Винер белән очрашты. Очрашуда шулай ук ТР яшьләр эшләре, спорт һәм туристлык министры Рафис Борһанов, Россия җыелма командасы әгъзалары: күп тапкыр Ауропа һәм дөнья чемпионы Евгения Канаева, Ауропа һәм дөнья чемпионы Дарья Кондакова, Ауропа һәм дөнья чемпионы Дарья Дмитриева, I Олимпия яшүсмерләр уеннары чемпионы Александра Меркулова да катнашты.

Татарстанда авылда эшкуарлыкка ярдәм күрсәтүнең яңа формаларын эзләячәкләр. Бүген Татарстан Президенты Рөстәм Миңнеханов ТР Игенчеләр сараенда узган ТР Фермерлар, крестьян хуҗалыклары һәм авыл хуҗалыгы куллану кооперативларының XII съездында әнә шулай дип белдерде.

Бүген Татарстан Президенты Рөстәм Миңнеханов ТР Кукмара муниципаль районында эш сәфәрендә булды. Республика башлыгы Кукмара шәһәр тибындагы бистәдә гражданнарны авария хәлендәге йортлардан күчерү программасы кысаларында төзелгән яңа йортларны карады.

Бүген Казанда ТР Президенты Рөстәм Миңнеханов катнашында Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгының ТР буенча Баш идарәсенә хәрби байрак тапшыру тантанасы булды. Шулай ук байрак тапшыру тантанасында Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгының баш хәрби эксперты Павел Плат, ТР Хөкүмәте беренче вице-премьеры Равил Моратов, шулай ук Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгының ТР буенча Баш идарәсе шәхси составы катнашты.

Бүген Казан Кремлендә Татарстан Республикасы Президенты Рөстәм Миңнеханов Үзбәкстан татарлары советы рәисе Рим Гиниатуллин белән очрашты. Очрашуда шулай ук ТР Президентының Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов катнашты.

Бүген Татарстан хөкүмәте рәисе Илдар Халиков Минзәлә муниципаль районында эшлекле визит белән булды. Ул Татарстанның Җир һәм милек мөнәсәбәтләре министры Азат Хамаев белән авария хәлендәге йорттан күчерергә тиешле гаиләләр өчен салынучы 36 фатирлы йорт төзелешен, Садак бистәсендәге сугыш ветераннары өчен һәм социаль ипотека буенча өйләрне, “Бәләкәч” программасы буенча ремонтланучы бинаны карады.

Бүген Татарстан Республикасы Президенты Рөстәм Миңнеханов Балтач районында булды. Президент бу җирлектәге визитын узган уку елында гына үзенең ишекләрен ачкан Кече Лыза авылында төзелгән яңа мәктәп белән танышудан башлады. Әлеге мәктәп бик кыска срокларда, фәкать 1 җәй эчендә халык соравы буенча салынды. Рөстәм Миңнеханов уку кабинетларында, спортзалда, ашханәдә булып, аларның җиһазлануына олы бәя бирде, укучылар һәм укытучылар белән сөйләшеп яңа уңышлар теләде. Балтачта исә ул иң беренче булып халык белән аралашты, шәхси эшмәкәрләр һәм сәнәгать предприятиеләре җитештергән товарлар күргәзмәсе белән танышып, аларга олы бәя бирде.