ЯҢАЛЫКЛАР

Агымдагы елның гыйнвар-февраль айларында республикада 300 375 кв. метр мәйданда торак сафка бастырылган. Бу, еллык биремнең 12,6 проценты. Ике ай эчендә сафка баскан торак мәйданының 71,2 мең кв. метры – 45 йорт социаль ипотека программасы өлешенә туры килә. Бу вакыт эчендә план биремен үтәү буенча иң зур күрсәткеч (69 процент) Апас районында, ә иң түбән күрсәткеч – 0,8 процент Түбән Кама районында теркәлгән. Әлеге мәгълүматларны бүген ТР Хөкүмәте йортында Президент Рөстәм Миңнеханов рәислегендә видеоконференция реҗимында узган киңәшмәдә төзелеш, архитектура һәм торак-коммуналь хуҗалык министры Ирек Фәйзуллин җиткерде. Киңәшмәдә шулай ук Премьер-министр Илдар Халиков катнашты.

Бүген ТР Президенты Рөстәм Миңнеханов “Стройтрансгаз”ААҖ генераль директоры Сергей Макаров белән очрашты.

ТР Президенты Рөстәм Миңнеханов Казан федераль (Идел буе) университетының химия, физика һәм икенче уку корпусларында булып, биредәге аудиторияләр, лабораторияләрнең торышы, кайбер биналарны реконструкцияләү проектлары белән танышты.

Бүген Татарстан Республикасы Президенты Рөстәм Миңнеханов Бакуда Гейдар Алиев исемендәге Фондта булды. Искәртеп узабыз, Татарстан Республикасы башлыгы Әзербайҗан башкаласы Бакуга эш сәфәре белән килде.

ТР Президенты Рөстәм Миңнеханов бүген Әзербәйҗанда эш сәфәрендә. Кичә кич ТР Президенты утырган очкыч Бакуның Гейдар Алиев исемендәге халыкара аэропортына килде. Татарстан башлыгын Әзербәйҗан Республикасы икътисади үсеш министры Шахин Мостафаев, РФ Әзербәйҗандагы Илчесе Владимир Дорохин, Татарстанның Әзербәйҗандагы Даими вәкиле Наил Зарипов һ.б. каршылады.

Бүген Татарстан Республикасы Президенты Рөстәм Миңнехановның Ирекле Саксония дәүләтенә эшлекле визиты барышында Россия һәм Германия төбәкләренең алдагы хезмәттәшлеге турында берничә документ имзаланды.

“Татарстан Республикасында Кеше хокуклары буенча вәкил институты эшчәнлеге дәүләт һәм муниципаль хакимият органнары эшендәге кимчелекләрне ачыкларга һәм бетерергә мөмкинлек бирә”, - дип белдерде бүген ТР Премьер-министрының беренче урынбасары Равил Моратов ТР Кеше хокуклары буенча вәкил карамагындагы эксперт советының киңәйтелгән утырышы барышында. Әлеге утырышта шулай ук ТР буенча Эчке эшләр министры Әсгать Сәфәров, ТР Дәүләт Советы Рәисе урынбасары Римма Ратникова һәм башка рәсми затлар катнашты.

Татарстан-Саксония хезмәттәшлеге үзара ярдәм итешүнең яхшы үрнәге булып тора, Россия һәм Германия арасындагы мөнәсәбәтләрне киңәйтүгә лаеклы өлеш кертә. Бүген Татарстан Президенты Рөстәм Миңнеханов Лейпциг ярминкәсе территориясендә оештырылган машина төзелеше һәм автокомпонентлар җитештерү мәсьәләләре буенча «Z/ Intec 2011» күргәзмә-ярминкәсе ачылышының рәсми өлешендә ясаган чыгышында әнә шулай дип белдерде.

Бүген Татарстанның Баулы муниципаль районы советы утырышында Баулы районының 2010 елдагы социаль-икътисади үсешенә нәтиҗә ясалды. Аның эшендә ТР Премьер-министры Илдар Халиков катнашты.

Россия төбәкләрендә гражданнарның универсаль электрон картасын файдалану өчен инфраструктура төзелергә тиеш. РФ Президенты Дмитрий Медведев бу хакта бүген Модернизация һәм икътисадның технологик үсеше буенча комиссия утырышында белдерде. Ул Универсаль электрон карта эшләү һәм кулланылышка кертү мәсьәләсенә багышланган иде. Мәскәүдә узган бу утырышта ТР Президенты Рөстәм Миңнеханов та катнашты.