ЯҢАЛЫКЛАР

Татарстан Президенты Рөстәм Миңнеханов Россия Федерациясе Президенты каршындагы Физик культура һәм спортны, югары казанышлар спортын үстерү, 2014 елда Сочида XXII кышкы Олимпия уеннары һәм XI кышкы Паралимпия уеннарын, 2013 елда Казанда XXVII Бөтендөнья җәйге универсиадасын әзерләү һәм үткәрү советы составына керде. Тиешле указга Россия Президенты Дмитрий Медведев кул куйды.

Бүген Казанда Республика яшьләр форумы 2010 үз эшен тәмамлый. Форумның финал этабында катнашучы талантлы яшьләр 3 көн дәвамында югары технологияләр өлкәсендәге IT-паркта 7 төп юнәлеш буенча идея һәм проектларын тәкъдим итте. Алар – “Яшьләр фәне һәм инновацияләр”, “Син –эшмәкәр!”, “Лидерлык”, “ Изгелек технологиясе”, “Карьера”, “Мәгълүмат агышы”, “Киләчәккә старт” юнәлешләре. Бу 7 юнәлеш буенча оештырылган мәйданнарда 600 гә якын талантлы егет һәм кыз эшләде.

Быелгы Форумда катнашырга теләк белдергән яшьләрдән 753 гариза алынган булган. Яшьләрнең турыдан-туры үзләре катнашында һәм читтән торып уздырылган турлардан соң, экспертлар финалга 54 проектны сайлап алган иде. Шулар арасыннан иң яхшы 30 дан артык проект бүген форумда катнашучыларны сәламләргә килгән ТР Президенты Рөстәм Миңнехановка тәкъдим ителде.

Бүген Казанда ТР Хөкүмәте йортында ТР Премьер-министры Илдар Халиков катнашында социаль әһәмияткә ия проектларны гамәлгә ашыруда катнашучы коммерцияле булмаган оешмалар өчен ТР Министрлар Кабинеты грантларын алу буенча республика конкурсы җиңүчеләрен бүләкләделәр.

Бүген Татарстан Республикасы Президенты Рөстәм Миңнеханов ТР Министрлар Кабинетында РФ Эчке эшләр министрлыгының Оештыру-инспекторлык департаменты башлыгы Владислав Волынский белән очрашты.

Бүген Мәскәүдә Кече һәм урта эшмәкәрлекне үстерү буенча Хөкүмәт комиссиясе утырышы узды. Очрашуда катнашучылар элек көн үзәгенә куелган мәсьәләләрнең беренчесен, “Патент нигезендә салым салу системасын камилләштерү турындагы федераль закон проекты”на багышланганы буенча гына фикерләште.

Ауропада иң эреләрдән саналган «Credit Suisse» инвестиция банкы Татарстан компанияләренә кайбер финанс хезмәтләре күрсәтергә мөмкин. Бүген республика Президентының банк вәкилләре белән очрашуында сүз әнә шул хакта барды.

Бүген ТР Президенты Рөстәм Миңнеханов Казан Кремлендә РФ элемтә һәм массакүләм коммуникацияләр министры урынбасары Алексей Жаров, “Спортивное вещание” автономияле коммерцияле булмаган оешмасы генераль директоры Василий Кикнадзе белән эшлекле очрашу уздырды.

ТР Президенты Рөстәм Миңнеханов “Пенсиягә федераль социаль өстәмә күләмен билгеләү өчен, 2011 елга Татарстан Республикасында пенсионерның яшәү минимумы күләмен билгеләү турында”гы ТР Законын имзалады. Аннан аңлашылганча, 2011 елда ТР пенсионерның яшәү минимумы 3992 сум күләмендә булачак. Закон тексты ММЧ да рәсми рәвештә басылып чыгачак.

Бүген Татарстан Республикасы Президенты Рөстәм Миңнеханов ТР Министрлар Кабинетында Алжир халык демократик республикасының Россия Федерациясендәге Гадәттән тыш һәм Тулы вәкаләтле илчесе Смәил Шерги белән очрашты.

Торак-коммуналь хуҗалыгы хезмәтләренә тарифлар формалаштыруда аудиторлык тикшерүләре бер муниципаль районны да читләтеп үтмәячәк. Бүген Татарстан Премьер-министры вазифаларын башкаручы Равил Моратов ТР Министрлар Кабинетында узган киңәшмәдә (анда кайбер районнарда үткәрелгән тикшерүләргә нәтиҗәләр ясалды) әнә шулай дип ышандырды.