ЯҢАЛЫКЛАР

Ел азагында “Казан 2013” Башкарма дирекциясе традицион төстә Россиянең саллы волонтерлар командасы эшчәнлегенә йомгак ясый. Шул уңайдан бүген Казанның “Пирамида” мәдәни-күңел ачу комплексында “Ел волонтеры” тантанасында, агымдагы елда иң яхшы эш нәтиҗәләре күрсәткән илнең 50 әйдәп баручы университетыннан һәм 30 субъектыннан волонтерлар делегацияләре билгеләп үтелде. Тантана РФ Спорт министры Виталий Мутконың видеосәламләвеннән башланды. Иң актив, булдыклы волонтерларны бүләкләү тантанасын Татарстан Президенты Рөстәм Миңнеханов ачып җибәрде.

Татарстанда Кече һәм урта бизнес предприятиеләре ассоциациясе төзелүгә 10 ел. Шул уңайдан бүген “Корстон”да ТР Президенты Рөстәм Миңнеханов катнашында юбилей тантанасы үтте. “Әле кайчан гына ассоциация кечкенә генә берләшмә иде. 2002 елда ул оешкан чакта, аның составында нибары 5 фирма иде, беренче җыелышыбызда 20 кешенең катнашуын да яхшы хәтерлим”, -дип искә алды ассоциация президенты Хәйдәр Хәлиуллин. Бүген әлеге берләшмә әгъзалары булган кече һәм урта компанияләр саны 200 дән артып китә. Алар бизнесның барлык өлкәләрен: мәгълүмат технологияләре, юридик хезмәтләрдән алып, җитештерүгә кадәр колачлый.

Бүген Казанда Бадминтон үзәге төзелешенә старт бирелде. Спорт комплексы ташын салу тантанасында Рөстәм Миңнеханов катнашты. Дөньяда беренче Бадминтон үзәге Оренбург трактында Теннис академиясе янында төзеләчәк. Спорт комплексы 2013 елгы Бөтендөнья универсиадасыннан соң файдалануга тапшырыла. Бадминтонны 2013 елгы Универсиада программасына кертү спортның бу олимпия төрен үстерүгә җитди этәргеч булды. Соңгы елда Татарстанда бадминтон белән шөгыльләнүчеләр саны 4 тапкыр арткан.

Бүген Казанга Россия Федерациясе Хисап палатасы рәисе Сергей Степашин килде. “Казан” халыкара аэропортында аны Татарстан Президенты Рөстәм Миңнеханов каршы алды.

Массакүләм спорт һәм югары казанышлар спорты өлкәсендә балалар-үсмерләр спорт мәктәпләре зур роль уйный. Шуны күздә тотып, бүген Россия Президенты Владимир Путин да Федераль Җыенга еллык Юлламасында әлеге төр мәктәпләр үсешен кайгыртуны өстенлекле юнәлеш итеп билгеләде. ТР Яшьләр эшләре, спорт һәм туризм министры Рафис Борһанов бүген Татарстанның Министрлар Кабинетында узган брифингта шул хакта билгеләп узды. Брифинг агымдагы елда спорт өлкәсендәге якынча йомгакларга һәм 2013 нче елга каралган планнарга багышланып оештырылган иде.

ТР Премьер-министры Илдар Халиков бу көннәрдә Женевада Татарстанның Бөтендөнья сәүдә оешмасы шартларында эшләвенә багышланган семинарның йомгаклау чараларында катнаша. СеминарЖеневаның Вильям Раппард үзәгендә уза.

Татарстанның Дәүләт киңәшчесе Минтимер Шәймиев, кичә Мәскәүдә Россия Президенты Владимир Путинның аны сайлау кампаниясе чорында актив яклаучы ышанычлы вәкилләре белән очрашуында, милли сәясәт белән бәйле мөһим тәкъдим керткән. Аның фикеренчә, киләчәктә закон проектлары кабул ителгәндә генә түгел, әзерлек барышында яки төзәтмәләр кертелгән вакытта, милли республика вәкилләренең сүзләренә дә колак салу нисбәтеннән, милли мәнфәгатьләрне яклаучы совет булдыру зур әһәмияткә ия. Бүген Минтимер Шәймиев бу хакта Казан Кремлендә журналистлар белән узган матбугат очрашуында белдерде.

Россиянең барлык төбәкләре вәкилләре Казан Универсиадасы кунаклары булырга тиеш. Бүген Мәскәүдә РФ Хөкүмәте рәисенең беренче урынбасары Игорь Шувалов Универсиаданың оештыру комитеты утырышында шулай дип белдерде. РФ Хөкүмәте йортында узган утырышта ТР Президенты Рөстәм Миңнеханов, РФ элемтә һәм массакүләм коммуникацияләр министры Николай Никифоров, РФ спорт министры Виталий Мутко, Россия Олимпия комитеты генераль секретаре Марат Бариев, Казан мэры Илсур Метшин, Универсиада дирекциясе җитәкчесе Владимир Леонов һ.б. катнашты.

Бүген Татарстан Республикасы Дәүләт киңәшчесе Минтимер Шәймиев Россия Президенты Владимир Путинның аны сайлау кампаниясе чорында актив яклаучы ышанычлы вәкилләре белән очрашуында катнашты.

Киләсе елның августында Швейцариянең француз телле өлешенең Сәүдә-сәнәгать палатасы әгъзалары булган бизнесменнар делегациясе Казанга киләчәк.