ЯҢАЛЫКЛАР

Бүген Татарстан Президенты Рөстәм Миңнеханов ТР Министрлар Кабинетында торак төзү һәм файдалануга тапшыру, шул исәптән ТР Президенты каршындагы дәүләт торак программасы буенча, Бөек Ватан сугышы ветераннары өчен яңа торак төзү мәсьәләләренә багышланган видеоконференция режимында республика киңәшмәсе үткәрде. Чарада шулай ук ТР Премьер-министры Илдар Халиков, министрлык һәм ведомство, республика муниципаль районнары җитәкчеләре катнашты.

Россия Федерациясе спорт, туристлык һәм яшьләр сәясәте министры Виталий Мутко Татарстан Республикасы Президенты Рөстәм Миңнехановка “1980 елда Мәскәүдә узган XXII Олимпия уеннарының 30 еллыгы истәлегенә медален” һәм Мактау грамотасы тапшырды.

Бүген Татарстан Республикасы һәм “Роснано” дәүләт корпорациясе арасында Казанда “Идея” технопаркы базасында Нанотехнологияләр үзәге төзү проекты буенча оештыру документлары пакетына кул куелды. Татарстан Республикасы ягыннан оештыру документларына “Татнефтехиминвест-холдинг” ААҖ генераль директоры Рафинат Яруллин, “Идея” инновация-җитештерү технопаркы” ААҖ директоры Сергей Юшко һәм ТР Инвестиция-венчур фонды директоры Айнур Әйделдинов, “Роснано” дәүләт корпорациясе ягыннан корпорациянең генераль директор урынбасары Андрей Свинаренко кул куйды.

Бүген ТР Министрлар Кабинетында видеоконференция режимында узган киңәшмәдә сәламәтлек саклау министры Айрат Фәррахов сәламәтлек саклау өлкәсендә мәгълүмат технологияләренә багышланган доклад ясады. Киңәшмәне ТР Премьер-министры Илдар Халиков алып барды.

Айрат Фәррахов сүзләренә караганда, Татарстанның Сәламәтлек саклау министрлыгы инновацион һәм мәгълүмат технологияләрен гамәлгә ашырудагы күп санлы проектлар башында тора. Бүгенге көндә министрлык тормышка ашыра торган иң эре проектларның берсе булып Диспетчер үзәге санала. Проект кысаларында Үзәк медицина сурәтләре архивы булдырыла. Архив Татарстанның медицина өлкәсендәге санлы диагностика җиһазларын берләштерә. Бүгенге көндә архивка 82 медицина аппараты тоташтырыла, базада 80 меңнән артык сурәт саклана. Хәзерге вакытта Үзәк медицина сурәтләре архивына тоташкан сәламәтлек саклау учреждениеләре даими рәвештә видеоконсультацияләр үткәрә.

Бүген “Казан” милли мәдәният үзәгендә ТР Экология һәм табигать ресурслары министрлыгы министр Әгъләм Садретдинов җитәкчелегендә “ЭКОлидер”, “Кеше һәм табигать” Республика конкурслары нәтиҗәләрен игълан итте.

Бүген Казанда Татарстан Президенты Рөстәм Миңнеханов рәислегендә “Татнефтехиминвест-холдинг” ААҖ Директорлар советы утырышы узды.

Утырышта “2011-2020 елларда һәм алдагы перспективада Татарстан Республикасы фармацевтика сәнәгате үсеше” дигән максатчан программа проекты каралды. “Татнефтехиминвест-холдинг” ААҖ генераль директоры Рафинат Яруллин хәбәр иткәнчә, программа “2020 елга кадәрге чорда Россия Федерациясе фармацевтика сәнәгате үсеш стратегиясе”, “2010-2020 елларда Татарстан Республикасында биотехнологияләрне үстерү” максатчан программасын үтәү йөзеннән һәм “2020 елга кадәрге чорда һәм алдагы перспективада Россия Федерациясе фармацевтика һәм медицина сәнәгатен үстерү” дигән федераль максатчан программа проекты нигезендә эшләнгән.

Бүген Казанда Татарстан Республикасы Президенты Рөстәм Миңнеханов рәислегендә “Татнефть” ААҖ Директорлар советының чираттагы утырышы узды.

Утырышта 2010 елның 8 аенда “Татнефть” ААҖнең бюджет үтәлеше нәтиҗәләре каралды һәм октябрьгә, агымдагы елның дүртенче кварталына бюджет расланды, 2011 елга “Татнефть” ААҖнең финанс-хуҗалык эшчәнлегенә фаразлар буенча фикер алыштылар.

Татарстан Президенты Рөстәм Миңнехановның Испания Корольлегенең Россия Федерациясендәге Гадәттән тыш һәм Тулы вәкаләтле илчесе Хуан Антонио Марк Пужоль белән очрашуы алда торган “Рубин” – “Барселона” матчы хакында фикер алышудан башланды. Очрашу бүген ТР Министрлар Кабинетында узды.

Татарстан Республикасы Вьетнам белән сәяси, икътисади һәм мәдәни элемтәләрне саклау һәм үстерүгә карата кызыксыну белдерә. Бүген ТР Президенты Рөстәм Миңнеханов Вьетнам Социалистик Республикасының Россиядәге Гадәттән тыш һәм Тулы вәкаләтле илчесе Буй Динь Зинь белән очрашуда әнә шулай дип белдерде. ТР Хөкүмәте йортында узган очрашуда шулай ук республика сәнәгать һәм сәүдә министры Равил Зарипов, Татарстан Республикасы Президентының Тышкы элемтәләр департаменты директоры – Татарстан Республикасы Президенты ярдәмчесе Тимур Акулов, Вьетнам илчелеге киңәшчесе, икътисади бүлек башлыгы Нгуен Тьи Там, илчелекнең сәяси мәсьәләләр буенча киңәшчесе Нгуен Тхань Ван, илчелекнең беренче секретаре Ле Минь Зан катнашты.

1 октябрьдән Идел буе таможня идарәсе таможня органнары яңа составта эшкә керешергә җыена. Әлеге структураның идарә системасын камилләштерү һәм урыннарда таможня контролен оештыру каралган Концепциягә (ул 2008 елдан бирле гамәлгә ашырыла) ярашлы рәвештә, шушы көннән Идел буе регионында Марий, Чуваш, Киров таможнялары Түбән Новгород таможняларына, Мордва һәм Пенза таможнялары Ульяновск таможнясына, Удмурт таможнясы Пермь таможнясына кушу юлы белән үзгәртеп корылачак. Моннан тыш, таможня постларының кайберләре таратыла, ягъни Татарстан таможнясының Яшел Үзән таможня посты, Башкортстан таможнясының Салават таможня посты, Самара таможнясының Новокуйбышев һәм Сызрань таможня постлары, Пермь таможнясының Соликамск таможня посты, Сарытау таможнясының Александров Гай таможня посты бетерелә.