ЯҢАЛЫКЛАР
Бүген Россия Федерациясе Хөкүмәте Рәисе Дмитрий Медведев "Сочи-2013 инвестицион форумы кысаларында Татарстан Республикасы стендында инжиниринг үзәкләренең республикада булдырыла торган проектлары белән танышты. Проектларны Россия Премьер-министрына Татарстан Республикасы Президенты Рөстәм Миңнеханов тәкъдир итте.
Татарстан Республикасының масштаблы проектларны гамәлгә ашыруда уникаль тәҗрибәсе бар, аны бөтен Россия буйлап кулланырга кирәк. Мондый фикерне Саклык Банкы башлыгы Герман Греф иртән узган "Сочи-2013" халыкара инвестицион форум кысаларындагы эшлекле ашта белдерде. Биредә Татарстан Республикасы Президенты Рөстәм Миңнеханов та чыгыш ясады.
Бүген ТР Хөкүмәт йортында Татарстан Президенты Рөстәм Миңнеханов белән Халыкара йөзү федерациясе президенты, Халыкара Олимпия комитеты әгъзасы Хулио Маглионе һәм Халыкара йөзү федерациясе башкарма директоры Корнель Маркулеску 2015 елның 17 июленнән 2 августында узачак спортның су төрләре буенча дөнья чемпионатына әзерлек мәсьәләләре буенча фикер алыштылар. Очрашуда “Казан 2013” Башкарма дирекциясе” коммерцияле булмаган автоном оешма генераль директоры Владимир Леонов, ТР Министрлар Кабинеты Аппаратының сәламәтлек саклау, спорт һәм сәламәт яшәү образын формалаштыру мәсьәләләре буенча бүлек җитәкчесе Андрей Кондратьев, ТР төзелеш, архитектура һәм торак-коммуналь хуҗалык министры Ирек Фәйзуллин, ТР яшьләр эшләре, спорт һәм туризм министры Рафис Борһанов, Казан мэры Илсур Метшин катнашты.
Бүген Казанда инженер белгечлегенә укыту буенча халыкара симпозиум кысаларында нефть, газ, химия комплексы предприятиеләре өчен инженер кадрлары әзерләү проблемаларына багышланган түгәрәк өстәл утырышы узды. Утырышта Россия Мәгариф һәм фән министрлыгы вәкилләре, илкүләм тикшеренү университеты ректорлары, Татарстан министрлыклары һәм әйдәп баручы предприятиеләр җитәкчеләре, халыкара һәм Россия иҗтимагый оешмалар вәкилләре катнашты. Казан илкүләм тикшеренү технология университеты ректоры Герман Дьяконов утырышның модераторы булды. Түгәрәк өстәлдә катнашучы Татарстан Президенты Рөстәм Миңнеханов республика предприятиеләрендә югары квалификацияле инженерларга ихтыяҗ артуын белдерде.