ЯҢАЛЫКЛАР

Иран Ислам Республикасы белән Татарстан арасында үзара багланышларны алга таба үстерү мәсьәләсе бүген ТР Хөкүмәт йортында Премьер-министр Илдар Халиковның Иран Тышкы эшләр министрлыгының төбәк мәсьәләләре буенча департаменты җитәкчесе Мөхәммәт Реза Мөршидзадә белән очрашуында күтәрелде. Илдар Халиков белдерүенчә, Иран вәкилләренең Казанга бу сәфәре ике республика арасында урнашкан җылы мөнәсәбәтләрнең тагын бер дәлиле. Ул әлеге мөнәсәбәтләрнең соңгы 10 елда аеруча актив үсештә булуын ассызыклап, багланышларны ныгытуга Иран Республикасының 2007 елда Казанда ачылган Генераль Консуллыгының зур өлеш кертүен билгеләп үтте. ТР Президенты Рөстәм Миңнеханов җитәкчелегендәге делегациянең узган елның декабрендә Иранга сәфәре дә багланышларны ныгытуга зур өлеш керткән.

Бүген ТР Президенты Рөстәм Миңнеханов рәислегендә ТР фәнни-техник өлкәдә кече формадагы предприятиеләргә венчур инвестицияләре салуны үстерүгә ярдәм фондының Попечительләр советы утырышы узды. Анда, аерым алганда, 2010-2011 елларда “Ак Барс Капитал” идарә компаниясенең венчур инвестицияләренең ябык пай инвестиция фондлары белән идарә буенча эшчәнлеге тикшерелде. Хәзерге вакытта “Ак Барс Капитал” идарәсендә булган әлеге фонд портфелендә IT һәм телекоммуникацияләр, машина, приборлар төзелеше өлкәләрендә махсуслашкан 5 компания исәпләнә.

Бүген ТР Президенты Рөстәм Миңнеханов Казан Кремлендә Индонезиянең Россиядәге Гадәттән тыш һәм Тулы вәкаләтле илчесе Джаухари Оратмангун белән очрашты. Очрашуда Татарстан ягыннан шулай ук Президентның Тышкы элемтәләр департаменты директоры -ТР Президентының халыкара мәсьәләләр буенча ярдәмчесе Искәндәр Мөфлиханов, икътисад министры Мидхәт Шаһиәхмәтов, ТР Инвестицион үсеш агентлыгы җитәкчесе Линар Якупов катнашты.

Люксембург Сәүдә-сәнәгать палатасы әгъзалары Татарстан белән мөнәсәбәтләрне үстерергә һәм республика компанияләре белән танышырга тели. Бүген Татарстан-Люксембург “түгәрәк өстәл”ендә чыгыш ясаган Сәүдә палатасының Директорлар советы әгъзасы Стив Бреер шулай дип белдерә. “Түгәрәк өстәл” ТР Президенты Рөстәм Миңнеханов җитәкчелегендәге делегациянең Люксембургка эш сәфәре кысаларында оештырылды.

Татарстан делегациясенең Люксембургка сәфәре хезмәттәшлек өчен яңа мөмкинлекләр ача. ТР Президенты Рөстәм Миңнеханов бүген Люксембург сәүдә палатасындагы очрашу вакытында шулай дип белдерде. Биредә Татарстан-Люксембург “түгәрәк өстәле” оештырылды, аның кысаларында Татарстанның икътисади һәм инвестиция потенциалы презентацияләнде.

Бүген Татарстан Президенты Рөстәм Миңнеханов җитәкчелегендәге Татарстан Республикасы делегациясе Люксембургта Ауропада иң зурлардан саналган “SES” спутник компаниясенең Телекоммуникацияләр белән идарә итү үзәгендә булды. Искәртеп узабыз, Рөстәм Миңнеханов җитәкчелегендәге Татарстан делегациясе Бөек Люксембург Герцоглыгында эш сәфәрендә.

Татарстан, Башкортстан, Мари Эл, Коми, Удмуртия, Чувашия Республикаларында, Киров өлкәсендә һ.б. кайбер төбәкләрдә автомобиль юлларында авыр йөк машиналары өчен вакытлыча чикләү кертелә (бу 1961 елның языннан гамәлдә). Бу язын юл кырыйлары һәм асфальт астындагы туфрак су һәм дымнан бүрткән булу, шуңа күрә, бердән, юлларда иминлек тәэмин итү зарурияте, икенчедән, юл өслеге бозылу белән аңлатыла.