ЯҢАЛЫКЛАР

Бүген ТР Премьер-министры Илдар Халиков сәламәтлек саклауны модернизацияләү төбәк программаларын тормышка ашыру мәсьәләләре буенча Бөтенроссия киңәшмәсендә катнашты. Киңәшмәне видеоконференция режимында РФ вице-премьеры Ольга Голодец үткәрде.

Тимур Акулов үз теләге белән республика башлыгы ярдәмчесе вазифасыннан азат ителде. Бу хакта Татарстан Президенты Рөстәм Миңнехановның 2012 елның 26 июнендә 291нче номерлы карары дөнья күрде.

Бүген Россия ЭЭМ Казан юридик институтында 2007 елда көндезге бүлеккә укырга керүчеләрнең чыгарылыш һәм диплом тапшыру тантанасы булды.

Бүген, Бөтенроссия Яшьләр көнендә, Татарстан Президенты Рөстәм Миңнеханов Кремльдә республиканың иҗтимагый тормышында актив катнашучы талантлы егет һәм кызлар белән очрашты. Яшьләр көнендә республика җитәкчелеге белән мондый очрашулар Татарстанда инде матур традициягә әйләнде. Бүгенге чарага чакырылучы 200 дән артык кеше арасында федераль бәйгеләр җиңүчеләре һәм призерлары, “Кадрлар резервы” яшьләр республика проекты финалистлары, балалар һәм яшьләр иҗтимагый оешмалары активы, шулай ук республикадагы Чит ил студентлары ассоциациясе әгъзалары – 12 ил вәкиле бар иде. Очрашуда ТР Премьер-министрының беренче урынбасары Равил Моратов, ТР Дәүләт Советы рәисе урынбасары Римма Ратникова, яшьләр эшләре, спорт һәм туризм министры Рафис Борһанов, башка министрлык һәм ведомстволар җитәкчеләре катнашты.

Бүген Татарстан Президенты Рөстәм Миңнеханов Нобель премиясе лауреаты, Россия фәннәр академиясе вице-президенты, Россия фәннәр академиясенең Санкт-Петербург фәнни үзәге президиумы рәисе Жорес Алферов белән очрашты. Шулай ук очрашуда республиканың мәгариф һәм фән министры Альберт Гыйлметдинов һәм ТР Фәннәр академиясе президенты Әхмәт Мәзһәров катнашты.

Бүген ТР Президенты Рөстәм Миңнеханов Казан Кремлендә республиканың иң титуллы спорт командасын – чирәмдәге хоккей буенча “Динамо-Казан” клубының тренерларын, уенчыларын, җитәкчеләрен кабул итте. Очрашуда ТР Премьер-министры урынбасары, “Диномо” физкультура-спорт җәмгыяте советы рәисе Әсгать Сәфәров, ТР Чирәмдәге хоккей федерациясе президенты Борис Павлов, ТР буенча эчке эшләр министры Артем Хохорин, ТР яшьләр эшләре, спорт һәм туризм министры урынбасары Хәлил Шәйхетдинов һ.б. катнашты.

Бүген ТР Президенты Рөстәм Миңнеханов “Атлантик” халыкара мәгариф үзәгенең попечительләр советы рәисе, РФ мәгариф һәм фән министры киңәшчесе Феликс Шамхалов һәм “Атлантик” халыкара мәгариф үзәгенең генераль директоры Фарук Кай белән очрашты. Шулай ук ТР Хөкүмәт Йортындагы очрашуда вице-премьер – республика Министрлар Кабинеты Аппараты җитәкчесе Шамил Гафаров, ТР мәгариф һәм фән министры Альберт Гыйлметднов, Казан Башкарма комитеты җитәкчесе Алексей Песошин катнашты.

Венчур фондлары белән хезмәттәшлектә тормышка ашырыла торган венчур проектларының санын арттыру ТР ИВФ җитәкчелегенең төп бурычларының берсе булырга тиеш. Бу хакта бүген Татарстан Премьер-министры Илдар Халиков ТР Хөкүмәт Йортында узган “Татарстан Республикасының инвестицион-венчур фонды” ГНО попечительләр советы утырышында белдерде.

Бүген Татарстан Президенты Рөстәм Миңнеханов Түбән Камада “ТАИФ-НК” заводында “Евро-5” дизель ягулыгы производствосын эшләтеп җибәрү тантанасында катнашты. Предприятие экологик стандартка туры килә торган “Евро-5” дизель ягулыгы җитештерә башлады.